Мексикийн хил дээр явуулж буй АНУ-ын бодлогоос болж Трампын засаглалд дургүйцэх хүн олон байна. Хууль бусаар хил давсан цагаачдыг гэмт хэрэгтэнд тооцож, эрүүгийн хуулийн дагуу хэрэгт татаж, гэр бүлийн гишүүдийг  нь салгаж байгаа талаар гадаадын эх сурвалжууд мэдээлж байгаа аж. Барагцаагаар 2000 хүүхэд эцэг эхээсээ салсан гэсэн судалгааг ч гадаадын сайтууд дурдаж байв. Олон нийтийн эсэргүүцлийн үр дүнд  АНУ-ын Гааль болон хил хамгаалах албаныхан сэтгүүлчдийг хүлээн авч цагаачдыг хорьж буй төвүүдтэй танилцуулжээ. Сэтгүүлчдийг зураг авах болон цагаачдаас яриа авахыг хориглосон байна. Харин Засгийн газраас батлагдсан зураг болон мэдээллийг сэтгүүлчдэд хэвлэн тарааж өгчээ.

"Гэр бүлийн гишүүдийг салгах бодлого барьж байна гэдэг бол ор үндэсгүй худал мэдээлэл юм. Хүмүүс, хэвлэл мэдээллийнхэн ташаа мэдээлэл тараахаа болих хэрэгтэй" гэж АНУ-ын Дотоодыг хамгаалах яамны нарийн бичгийн дарга Кирстжен Ниэлсэн (Kirstjen Nielsen) хэлсэн байна. Мөн тэрээр "Тэнд байгаа цагаачдын нэг нь ч албан ёсоор орогнол хүсээгүй. Хэрэв тухайн хүн гэр бүлтэйгээ орогнол хүсэж байгаа бол хууль бусаар хил давах ямар ч шаардлага байхгүй" гэжээ. Ингээд хил дээр баригдсан хууль бус цагаачид яг ямар орчинд хоригдож байгаа талаар цухас танилцъя.

Цагаачид төмөр торонд хоригдож, мөнгөлөг цаас нөмөрч, хүйтэн шалан дээр гудас тавин унтдаг гэнэ. Гэвч албаныхан бүх цагаачдыг зохистой хоол унд болон шүршүүр, цэвэр хувцас, эмнэлгийн үйлчилгээгээр хангадаг гэж мэдээлжээ.

Ням гаригт хэвлэл мэдээллийнхэнд өгсөн мэдээгээр насанд хүрсэн 751 хүн, 258 хүүхэд хоригдож байгаа гэсэн тоо гарчээ. Тэд цагаачдыг гурван хэсэгт ангилан байрлуулсан байна. Харгалзах хүнгүй хүүхдүүд, насанд хүрсэн хүмүүс, хүүхэдтэй эцэг эхчүүдийн гэсэн хэсгүүдэд хуваадаг гэнэ.

Цагаачдын байрлаж буй байгууламжуудын нэг болох "McAllen"-ы асрах газарт дөрвөөс доош насны хүүхдийг эцэг эхээс нь салгаагүй гэж холбогдох газрын дарга Мануэл Падилла хэлсэн байна.

Цагаач эмэгтэйчүүдийн эрхийг хамгаалах хорооны захирал Мишиэль Бранэ (Michelle Brane) "McAllen"-ы асрах газрын байдалтай танилцсан байна. Тэнд Мишиэль эцэг эхээсээ салсан хүүхдүүдийг асарч байсан 16 настай охинтой уулзжээ. Тэр охин бусдадаа хэрхэн живх солих талаар заах хэрэгтэй болсон гэнэ.

Цагаачдыг хорьж байгаа ганц газар нь "McAllen" биш юм. Техас мужийн Броунсвиллийн "Casa Padre" гэх газар өмнө нь "Walmart " дэлгүүр байсан. Харин одоо энэ газрыг харгалзах хүнгүй хүүхдүүдийг асрах газар болгосон аж. "Washington Post"-ын мэдээлж байгаагаар одоогоор 1400 хөвгүүн тэнд байгаа гэсэн тоо бий.