Хэрэв та өөрийн iPhone гар утсандаа iOS 11.4 үйлдлийн системийн шинэчлэлийг (update) суулгах гэж байгаа бол түр азнаарай. "Apple" компани тус шинэчлэлийг хоёр долоо хоногийн өмнө гаргасан. Энэ нь мессежүүдээ "iCloud"-д хадгалах боломж олгодог болсноороо давуу талтай. Гэвч "update" хийснээс хойш утасны цэнэг маш хурдан дуусаж байгаа талаар олон гомдол ирэх болжээ. "Update" хийсний дараа утасных нь цэнэг 25 хувиар хурдан унаж байсан талаар нэг хэрэглэгч уурсан санал бодол солилцдог, үнэлгээ өгдөг сайт болох "Reddit"-д бичсэн байна. Яг юу энэ асуудлыг үүсгээд байгаа болон хэрхэн шийдэх талаар "Apple" компани албан ёсны мэдэгдэл өгөөгүй байгаа юм.
Гэвч зарим хүн уг асуудал нь хэрэглээгүй аппликэйшнийг дуудаж сэргээдгээс болж байна хэмээн таамагласан аж. Тэдний хэлж буйгаар та гар утсаа хэрэглээгүй байсан ч аппликэйшнүүд ажиллаж байдаг учир цэнэг нь хурдан дуусаж байгаа гэнэ. Үүнийг зогсоохын тулд та гар утасныхаа "Settings" рүү ороод "General"-ийг сонгоно. Тэндээс "Background Refresh"-ийг "off" болгосноор дээрх үйлдэл автоматаар хийгдэхгүй гэнэ.
"Миний "iPhone 6" загварын гар утас өмнө нь зүгээр ажиллаж байсан. Харин iOS 11.4 шинэчлэлийг хийснээс хойш хэрэглээгүй байхад л цэнэг нь дуусаад байна" гэж нэг хэрэглэгч бичсэн бол "Миний утасны цэнэг бүтэн өдөр хангалттай даадаг байсан. Надад утсаа тухайн өдөр дахин цэнэглэх шаардлага гардаггүй байсан. Харин одоо өдрийн тал хүрвэл их юм" гэж зарим хэрэглэгч бичиж байгаа аж.
