Хамгийн гоё өдөр өнөөдөр
Жил бүр уламжлал болгон зохион байгуулдаг "Автомашингүй өдөр" буюу "Улаанбаатар марафон" олон улсын гүйлтийн тэмцээн өнөөдөр тохиож байна.
"Улаанбаатар марафон"-д 2014 онд 16839, 2015 онд 18085, 2016 онд 27000, өнгөрсөн онд 30000 иргэн хамрагдсан бол энэ жил нийслэлийн иргэдээс гадна хөдөө, орон нутаг, Монгол Улсад ажиллаж, амьдарч байгаа гадаадын иргэд, хөрш зэргэлдээ орныхон болон олон улс, тив, дэлхийд танигдсан нэртэй тамирчид зэрэг 30 мянга гаруй иргэн бүртгүүлэн оролцож буй аж.
Гүйлтэд Австрали, Америк, Бахрейн, Боливи, Итали, Ирланд, Малайз, Герман, Канад, Киргиз, Кени, Лаос, Хятад, Шинэ Зеланд, Хонконг, Франц, Этиоп, Ямайк, Япон, Нидерланд, Орос, Сингапур, Африк, Өмнөд Солонгос, Испани, Их Британи, Швейцарь, Уганда, Зинбаб зэрэг дэлхийн 30 орны 400 гаруй тамирчин оролцож буйгаараа онцлог гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Авто машины хэрэглээг багасгах, өөр төрлийн зорчих хэрэгслийг сонгох, агаарын бохирдлыг бууруулахад хувь нэмрээ оруулахыг иргэд, олон нийтэд уриалсан энэ өдөр нийслэлчүүд хүүхэд багачуудаа дагуулан гэр бүлээрээ салхинд гарч, тааваараа алхан тун жаргалтай харагдана. Хоёр хүүгээ хөтлөн эхнэртэйгээ алхах ахын "Хамгийн жаргалтай өдөр өнөөдөр байна" гэх үг хэчнээн сайхан сонсогдоно вэ.
Манай улс энэхүү арга хэмжээг ес дэх жилдээ тэмдэглэн өнгөрүүлж буй.