С.Зоригийн хэрэг олон нийтэд ил болбол улстөр, хууль хяналтын олон дарга нар торны ард сууна
Монгол Улс уруудлынхаа зам руугаа шуударч, улстөрчдийн үйлдэл даварч, онц ноцтой олон нууцлаг хэрэг чухамхүү С.Зоригийн хэргийн дараагаас бий болсон гэдэг.
С.Зоригийн хэргийг шийдэж чадалгүй МАНАНтсанаас энэ бүхэн эхэлсэн бөгөөд С.Зоригоос хойш хэчнээн ч улстөрч, том хүмүүсийг нь цааш нь харуулав даа.
Наранцацралт, Дашбалбар, Отгонбилэг, Дангаасүрэн гээд замд тээглэсэн бүхэн байхгүй болжээ. Гол нь тэд байхгүй болсноор өнөөдрийн энэ хэдэн улстөрч толгойд гарч, уул уурхай, банк, бонд, тендер, газар гэх мэт аль мөнгө төгрөг ихтэй зүйлд гараа шургуулсан "бизнесийн мафи" бий болов.
Бүр энэ мафийн толгойлогчоор нь Төрийн тэргүүн ажиллаж байсан гэх итгэл үнэмшил ард олны дунд суусан байна. Олны үг ортой л гэдэг.
Бүх зүйл С.Зоригийн хэргээс эхлэлтэй гэдгийг л энд дахин дахин онцлох гэсэн юм. Тухайн үед Эрдэнэт үйлдвэрийн даргаар өөрийн талын хүнийг тавих гэж улайрахын сацуу улс орны эдийн засгийг самарсныхаа төлөөсөнд Ерөнхий сайдын албан тушаалаа алдсан Ц.Элбэгдорж орныхоо хүнээрээ Да.Ганболдыг бараг 10-нтаа зүтгүүлсэн байдаг.
Энэ үед Эрдэнэтийн даргаар Ш.Отгонбилэг агсан ажиллаж байсан бөгөөд тэрээр Ерөнхийлөгч Н.Баганбандитай ойр дотно байв.
Энэ мэт шалтгаанаас болж Н.Багабанди Ц.Элбэгдоржийн оруулж ирсэн саналыг нэлээд хэд буцаасны дараа тэрээр Ерөнхий сайдын албан тушаалд Э.Бат-Үүлийг зүтгүүлсэн байдаг. Бас л Н.Багабанди хүлээж аваагүй. Ингээд эцэстээ Дэд бүтцийн сайдын үүрэг гүйцэтгэгч, УИХ-ын гишүүн С.Зориг Ерөнхий сайд болох нь гарцаагүй болов.
Ерөнхийлөгч Н.Багабанди тэргүүтэй МАН-ынхан ч С.Зоригийг дэмжиж байв. С.Зориг нь Ц.Элбэгдорж болон түүний талын хүмүүсээс тусдаа бие даасан улстөрч байсан юм. Тэр Ерөнхий сайд Засгийн эрхэнд гараад улс орны эдийн засгийг самарч, төрийн өмчийн банкуудыг зохиомлоор шахуу дампууруулсан зэрэг олон бусармаг хэрэг илчлэгдэх боломжтой байсан гэдэг.
Ямартай ч, С.Зоригийг Ерөнхий сайдаар хүлээн зөвшөөрөхийг шийдэх чухал хурлын өмнө амь насыг нь хөнөөсөн байдаг. Алуурчид С.Зоригтой тохиролцох гэж оролдсон уу эсвэл Б.Булганы амыг хамхих зорилгоор үлдээсэн үү, С.Зоригийн гэрээс их хэмжээний бэлэн мөнгө олдсон. Харамсалтай нь, дараа нь цагдаагийн дарга нар тэр мөнгийг хэргийн газарт байгаагүй болгосон.
Ерөөсөө С.Зоригийн хэргээс хойш цагдаа, хууль хяналтын байгууллагын зарим дарга, удирдлага илт хөлжиж эхэлсэн. Бүр С.Зоригийн хэргийг илрүүлнэ хэмээн амалж УИХ-д сонгогдсон хурандаа Д.Мөрөн анхнаасаа энэ хэргийг баллах зорилгоор ЦЕГ-ын даргын албан тушаалд очсон байх магадлалтай дүр зураг одоо харагддаг.
С.Зоригийн амь насыг захиалсан хүнийг мэдэж байгаа мань хүн одоо Гадаадын иргэн харьяатын газрын дарга хэмээх шагналын албан тушаалд оччихсон тууж явна.
Энэ мэт С.Зоригийн хэрэг дээр амаа үдэж явж буй хүмүүс насаараа шагналын албан тушаал эдэлж байгаа. Ганцхан С.Зориг гэдэг хүний хэрэгтэй холбоотойгоор 20-иод хүнийг цааш харуулсан, түүний дотор цагдаа нараа хүртэл "ангуучилсан" улстөр, хууль хяналтын салбарт байгаа хүмүүс С.Зоригийн хэрэг илэрчих вий гэж тэвдэж байх шиг.
Монгол Улсад шударга бус зүйл дэндүү их болж, "шударга бусын хонгил" үүссэн ч тэнгэрийн муухай арилдгийн адилаар С.Зоригийн хэргийг эрүүлээр шийдэх гэсэн шинэ давхарга гарч ирэв.
Ингээд Нийслэлийн прокурорын газраас Б.Булганыг С.Зоригийн хэрэгт яллагдагчаар татав. Яллагдагчаар татна гэдэг нь энэ хэрэгт Б.Булган гэм буруутай байна л гэсэн үг.
Тэгвэл үүнтэй зэрэгцээд, үл ялиг өмнө нь Тагнуулын ерөнхий газраас Б.Булганыг дуудаж нууц задруулахгүй байх гарын үсэг зуруулсан.
Нэг нь байцаалт мэдүүлэг авах гээд, нөгөөх нь байцаалт мэдүүлэг өгч болохгүй гээд дарамтлаад байх шиг. Хэрэв тийм бол манайд С.Зоригийн хэргийг илрүүлэхгүй байхыг хүсэгчид одоо ч бий бөгөөд тэд хууль хяналтын байгууллагыг өөрийнхөө гараар хөдөлгөж, хооронд нь "байлдуулж тоглож" байна.
Өмнө нь ч ийм дүр зураг байдаг л байсан. Улстөрчдийн "шатрын хүү" болсныхоо хариуд хууль хяналтын байгууллагын дарга нар илт хөлжиж, өндөр албан тушаалуудыг ээлж дараалан хашиж, цол тэмдгэнд ч хурдан хүрдэг байв. Зарим нь "бэрс" гарахыг хүсэхээрээ С.Зоригийн хэргийг шүүрч авдаг байдал зөндөө л харагдлаа. Хамгийн сүүлд Тагнуулын ерөнхий газрын дарга Б.Хурц энэ хэргийг шүүрч авсан бөгөөд С.Зоригийн хэргийг илрүүлэхэд сайн ажилласан гээд Ц.Элбэгдорж түүнд Хошууч Генерал цол олгосон.
Харин С.Зоригийн хэрэг үнэхээр илэрсэн эсэх одоо нягтлагдах гэж байна.