АНУ-ын Ерөнхийлөгч Дональд Трамп болон Хойд Солонгосын удирдагч Ким Жон Ун нарын дээд хэмжээний уулзалтад гарч болзошгүй саад тотгорууд болон хаана уулзаж болох талаарх шинэхэн мэдээллийг хүргэе.

Ирэх долоо хоногуудад хоёр Төрийн тэргүүний уулзалт болох газар хаана зохиогдох тов гарах ч тэд үнэхээр уулзах эсэх нь одоо ч тодорхойгүй. Хойд Солонгосын удирдагч Ким хуучин ЗХУ-д үйлдвэрлэгдсэн онгоцоор нисч Хойд Солонгосоос хэдэн мянган километрийн алсад очих эсэх нь тодорхойгүй байгаа юм. Энэ талаар Хойд Солонгосын асуудал хариуцсан шинжээч, Үндэсний Аюулгүй байдлын зөвлөх ажилтан Сью Ми Терри "Тэдэнд байгаа онгоц хуучин бөгөөд тус онгоц нь ажиллахгүй гэдгийг хэн ч мэдэхгүй шүү дээ" гэв.

Ким Жон Ун 2011 онд эрх мэдлээ авснаас хойш өөрийн улсаас гадагш нисээгүй бөгөөд түүний тээврийн хэрэгслийн энэ асуудал улс төрийн хүндрэл бэрхшээлийг давах туулах "тодорхойгүй" уулзалтад нөлөөлж болохоор байна. Үүнээс гадна Трамп, Ким нар урьд өмнө нь хэзээ ч уулзаж байгаагүй юм.

Магадгүй тэрээр өөрийнхөө тав тухад биш аюулгүй байдалд санаа зовнидог байх. Өнгөрсөн сард Хятад руу айлчлах хийхийнхээ өмнө "Ойрхон уулзаж болох уу" гэж асуусан гэдэг. Онолоор бол энэ нь боломжит хувилбар биш билээ. 

Харин Трамп Хойд Солонгосын нийслэл Пхеньянд очиж асуудлыг шийдэх болов уу? Гэвч тэрээр ингэж Кимд хүндэтгэл үзүүлэхийг хүсэхгүй. Энэ талаар Хятадад АНУ-ын Элчин сайдаар ажиллаж байсан Дэвид Рэнк "Трампад 3000 гаруй км ниснэ гэдэг хэцүү шүү дээ" хэмээсэн юм.

АНУ-ын зүгээс Трамп-Кимийн уулзалтыг Европт хийх боломжийг судалсан ч одоогийн байдлаар энэ талаар ямар ч сонголт гаргаагүй байна. Гэхдээ тэдний уулзах газар Европын аль нэг улс байж болно.

1 Европ тив

Онолоор бол Швед, Швейцарь гэх мэт төвийг сахисан улсууд тохиромжтой. Энэхүү 2 улс нь АНУ, Хойд Солонгостой дипломат харилцаатай бөгөөд хурлыг зохион байгуулах хүсэлтэй байгаагаа илэрхийлсэн. Эдгээр газрууд нь түүхэн дэх хамгийн чухал дипломат уулзалтыг хийсэн байдаг.

Тухайлбал, 1985 онд АНУ-ын Ерөнхийлөгч Рональд Рейган, ЗХУ-ын удирдагч Михаил С.Горбачев нарын уулзалтыг зохион байгуулсан. Энэ нь АНУ, Хойд Солонгос улсын аль алиных сонирхлыг татахуйц дүр төрхийг бий болгож чадна.

Гэхдээ Ким Европ руу  очихын тулд онгоц хэрэгтэй. Энэ тухай Хойд Солонгосын асуудал хариуцсан ҮАБ-ын зөвлөх ажилтан Сью Ми Терри "Онгоцны худалдаа арилжаа хийхгүй" гэж мэдэгджээ.

2 Америкийн нутаг дэвсгэр

Ким онгоцоороо өөрийнхөө улсаас Хавай эсвэл Гуам руу аялал хийж болох ч түлш дуусах магадлалтай учир хамгийн ойрхон АНУ-ын газар нутгаас түлш авах шаардлагатай болно. Энэ талаар БНСУ-ын шинжээчид Ким үүнийг хүлээн зөвшөөрөхгүй гэж үзсэн байгаа аж.

3 Солонгосын хойг

Трамп-Ким нар БНСУ-ын хойгт уулзах нэг байршил бий. Энэ байршил нь цэрэггүй бүс дэх Панмунжон тосгон бөгөөд хамгийн боломжтой газраар яригдаж байна. Панмунжоны нутаг дэвсгэрийн өргөн 40 км бол урт нь 241 км юм. Тийм учраас энэ бүс нутагт хааяа уулзалтууд зохион байгуулагддаг. Панмунжомын Өмнөд Солонгосын тал дахь Энхтайвны ордон нь хоёр удирдагчийн уулзалтад илүү тохиромжтой. Тус газар нь Хойд ба Өмнөд Солонгосыг заагласан хилийн зурвас билээ.

Хэрвээ Солонгосын хойгт дээд хэмжээний уулзалт болвол Ким 3 цагийн жолоодлого хийхэд л хангалттай юм. Харин Трампын хувьд "Барын ам руу давхиад орохтой" адил зүйл болно. Энэ тухайд "Трампын хэтийн төлвийг бодож үзэх хэрэгтэй, тийм ч халуухан санал биш шүү дээ" гэж Сью Ми Терри хэлсэн юм.

Энэхүү газарт уулзалт хэрвээ болвол Кимд маш их ашигтай. АНУ-ын Ерөнхийлөгч төдийгүй, дээд албан тушаалтнууд ч ирэх болно. Гэтэл энэ аялах маршрут бол Трампын хувьд асуудал болно. Мөн өөрийн орны хэрэгцээгээ сайшааж, хэлэлцээний байр суурь, гадаад бодлогоо үл тоомсорлох байдал ч үүсч болзошгүй.

Хойд Солонгос 1948 онд бие даасан улс байгуулахаар болсноос хойш АНУ-тай дипломат харилцаагүй байгаа бөгөөд дээрх уулзалт Пхеньян болон Пхеньяний харьяаны газар нутагт болвол аюултай гэж АНУ-ын гадаад бодлогын шинжээчид үзэж байна. 

4 Ази тив

Ази тивээс Трамп-Ким нарын дээд хэмжээний уулзалтыг Вьетнам, Сингапур, Хятад, Япон зэрэг улсуудаас сонгон зохион байгуулж болно. Хэрвээ Хятадад тус уулзалт болвол Трамп-Бээжин хоорондын улс төрийн асуудлуудтай тулгарах юм. Энэхүү түүхэн уулзалтыг зохион байгуулахад Хятадаас тусламж хүсэх нь АНУ-д ичгэвтэр зүйл болно. Харин Кимийн хувьд Хятадуудтай сайн харилцаатай тул уулзалт болвол түүнд ашигтай. Иймд "Хятад улсад дээд хэмжээний уулзалт хийх нь АНУ-ын улс төрд ямар ч хэрэггүй" гэж Дэвид Рэнк  хэлэв.

5 Япон улс

АНУ-ын Ази дахь ойрын холбоотон Япон улс Хойд Солонгостой удаан хугацааны турш таагүй харилцаатай байгаа. Тиймээс энд уулзахыг Ким зөвшөөрөхгүй. 

6 Монгол улс

Дээрх газруудад уулзалт зохион байгуулахад тохиромжгүй байгаа тул Монгол улсын нийслэл Улаанбаатарт Трамп-Ким нарын дээд хэмжээний уулзалтыг зохион байгуулах санал гарч ирж байгаа билээ. Улс төрийн энэхүү уулзалтыг Улаанбаатар хотод зохион байгуулах нь хамгийн тохиромжтой гэж Жон Хопкинсийн их сургуулийн Солонгос судлаач Жоел Вит хэллээ. Учир нь "Монголчууд өөрсдийгөө Азийн "Швейцарь" гэж боддог" гэж Вит хэлсэн юм.

NYTimes