Дэлхийн улс орнуудын мөнгөн дэвсгэрт ямар нууцлалтай байдаг вэ?
Техник технологи хөгжих тусам мөнгөн дэвсгэртийн нууцлал сайжирсаар байгаа. Харин хуурамч дэвсгэртийн асуудал тэртээд мөнгө үүссэн цагаас л байсан билээ. АНУ-д 1861 оны үед гүйлгээнд байсан мөнгөн дэвгэртүүдийн тал нь хуурамч байсан гэсэн судалгаа ч байдаг. Тэгвэл дэлхийн улс орнуудын мөнгөн дэвсгэртэд нууцлалын хувьд төстэй хэдэн зүйл байдгийг зээлийн үйлчилгээ явуулдаг "TitleMax" компанийн сайт инфографикаар үзүүлсэн байна. Тэд дэлхийн даяар гүйлгээнд хэрэглэгдэж буй 10 дэвсгэртийг сонгон авчээ.
Түгээмэл хэрэглэгддэг нууцлалууд нь:
- Полистероор хийсэн мөнгө (Plastic money)
- Холограм ашиглах (Holograms)
- Усан хээ (Watermarks)
- Маш жижгээр бичсэн үгс (Microtext)
- Өнгө нь өөрчлөгддөг зураг (Color-changing features)
- Металл утас (Security thread)
- Нүдэнд үл үзэгдэх бичил дүрс (Invisible marks)
1 Полистероор хийсэн мөнгө (Plastic money)
Канад улсад нэг сая мөнгөн дэвсгэрт бүрээс 470 ширхэг хуурамч мөнгө гарч ирсэн нь "Их 20"-ийн улсууд дундаа хамгийн өндөр үзүүлэлттэй гарчээ. Тиймээс тэд хуурамчаар үйлдэхэд хэцүү полистер материалыг мөнгө хийхдээ ашиглаж эхэлжээ. Австрали улс уг аргыг анх 1988 онд хэрэгжүүлж байсан төдийгүй түүнээс хойш АНУ, Их Британи, Малайз, Чили, Шинэ Зеланд, Мексик зэрэг улс полистер материал ашиглах болсон байна.
2 Холограм ашиглах (Holograms)
300 гаруй нэр төрлийн 97 мөнгөн тэмдэгтэд холограм нууцлалын хэлбэрийг ашигладаг байна. Энэ нь ихэвчлэн солонгорч харагдах төдийгүй тууз, наалт хэлбэртэй байдаг аж.
3 Усан хээ (Watermarks)
Усан хээ нь түгээмэл хэрэглэгддэг нууцлалын арга бөгөөд мөнгөн дэвсгэртийг гэрэлд харахад ямар нэгэн дүрс тодорч үзэгддэг байна.
4 Маш жижгээр бичсэн үгс (Microtext)
Зөвхөн томруулдаг шилээр л унших боломжтой үгнүүдийг мөнгөн дэвсгэрт дээр бичдэг байна.
5 Өнгө нь өөрчлөгддөг зураг (Color-changing features)
2011 оноос хойш хэвлэгдсэн мөнгөн тэмдэгтүүдэд уг нууцлал байдаг. Тухайн хүн аль өнцгөөс харж байгаагаас шалтгаалж зургийн өнгө өөрчлөгддөг аж.
6 Металл утас (Security thread)
Металл утас нь мөнгөн дэвсгэртийн гол дунд тасалдсан байдалтай харагддаг.
7 Нүдэнд үл үзэгдэх бичил дүрс (Invisible marks)
Мөнгөн дэвсгэртэд зөвхөн хэт ягаан туяанд харагдах нууц тэмдэглэгээ байдаг бөгөөд түүнийг энгийн нүдээр харах боломжгүй гэнэ.
