Тэрбумтны охин гэж бусдыг залилсан эмэгтэйд 15 жилийн ял өгнө
ОХУ-ын тэрбумтны охин болж дүр эсгэсэн энэ эмэгтэй АНУ-ын банкнаас зээл авч, үнэтэй зочид буудал, ресторанаар үйлчлүүлж, гадаадад аялж, олон хүнийг залилсан хэрэг өнгөрсөн онд дуулиан тарьж байсан билээ. Тэгвэл тус хэргийн ээлжит шүүх хурал өчигдөр Манхэттен дүүргийн шүүх танхимд болжээ.
Залилан хийсэн 27 настай Анна Сорокин нь ОХУ-д төрж, Германд өссөн аж. Тэрээр ОХУ-ын алдартай тэрбумтны охин Анна Дэлвэйн хэмээн өөрийгөө танилцуулж, Манхэттений үйлчилгээний олон байгууллагыг 2013 оноос хуурч эхэлжээ. Тэрээр "Анна Дэлвэйн сан" байгуулахын тулд зээл авах хүсэлтэй байгаагаа банкуудад хэлж, Нью-Йоркийн хамгийн тансаг зочид буудлуудад удаан хугацааны турш төлбөр төлөлгүй байрласан байна. Мөн Анна "Vanity Fair" сэтгүүлийн гэрэл зурагчныг мэхэлж Морокко руу хийсэн 62 мянган ам.долларын өртөгтэй аяллынхаа зардлыг төлүүлсэн аж. Тэрээр өдөр тутмын хэрэглээний зардлаа хуурамч чекээр төлдөг байжээ. Түүний нийт залилсан мөнгөн дүн хэдэн зуун мянган доллар хол давж байгаа гэнэ.
Анна хэргээ хүлээсэн төдийгүй шүүгчээс ялыг нь хөнгөлж гурван жилийн хорих ялаар шийтгэхийг хүссэн байна. Шүүгч түүний хүсэлтийг хүлээн аваагүй бөгөөд "Тэр залилсан хүмүүсээсээ санаа зовох ёстой байтал огтхон ч гэмшсэн байдал харагдахгүй байна. Ийм том хэрэг хийсэн хүнд гуравхан жилийн ял өгнө гэдэг түүнийг духан дээр нь ганц нясалж байгаатай адил зүйл" хэмээн шүүгч Диана Киэсэл ширүүхэн хэлжээ. Шүүх түүнд оноох шийтгэлд хөнгөлөлт үзүүлэхгүй бол Анна 15 жилийн ял авах магадлалтай байгаа аж.
Анна Дэлвэйгийн дүрд тоглож байхдаа инстаграмдаа оруулсан зургууд
Анна энэ оны эхээр "New York" сэтгүүлд өгч байсан ярилцлагадаа "Би хөгжилдөж байсан. Ганц зүйл буруу хийлээ гээд зөв хийсэн олон зүйл минь алга болохгүй. Би тийм муу хүн биш. Хүмүүс миний хийсэн зүйлийг аймшигтай зүйл мэтээр ярьж байна. Гэхдээ би үүнийг социологийн туршилт гэж бодож байна" гэж хэлжээ.