АНУ-ын алдарт реппер XXXTentacion өнгөрсөн даваа гаригт машин дотроо буудуулан нас баржээ. Тэрээр шинэ мотоцикль худалдан авахаар Флорида мужийн Майами хотын автомашины гэрээт борлуулалтын төвд ирсэн аж. Өдрийн 15.57 цагийн үед буун дуу гарсан тул цагдаагийнхан хэргийн газарт очсон байна. Тэд алдарт репперийг машиндаа ухаангүй байхыг нь олж эмнэлэгт хүргэсэн боловч амийг нь аварч чадаагүй аж. "Dodge Journey SUV" загварын хар өнгөтэй машинтай хоёр залуу дээрэм хийх зорилгоор түүнийг хороосон хэмээн цагдаа нар таамаглаж байгаа гэнэ.  Учир нь хохирогчийн машинаас "Louis Vuitton" брэндийн цүнх алга болсон байна.

"Олонд XXXTentacion нэрээрээ танигдсан 20 настай Жахсэх Онфрой (Jahseh Onfroy)-ыг уг хэргийн хохирогч гэдгийг тогтоосон" хэмээн Флоридагийн Броуард Каунти суурингийн цагдаагийн газар твиттер хуудсаар дамжуулан зарласан байна. Тэд хэрэгт холбогдох нотлох баримт болон үнэ цэнэтэй мэдээллийг 3000 ам.доллараар худалдаж авна гэж зарлажээ. 

Реппер бие давхар найз охиндоо гар хүрсэн хэргээр 2016 оны аравдугаар сард баривчлагдаж байжээ. Хэргийн мөрдлөг, шинжилгээ, шүүх хурал энэ оныг хүртэл сунжирч байсан юм. Мөн тэрээр өмнөх жил нь зургаан сар шоронд хоригдож байсан бөгөөд хамгийн сүүлд өнгөрсөн арванхоёрдугаар сард шоронд орсон боловч батлан даалтаар удалгүй суллагджээ.

Жолооныхоо ард буудуулсан байгаа репперийн зураг даваа гаригийн оройноос интернэт орчинд хаа сайгүй харагдаж эхэлсэн аж. Гэнэтийн мэдээнд цочирдсон фэнүүд нь твиттер хуудсаар дамжуулан гүн эмгэнэл илэрхийлсэн байна.

"Амар амгалан нойрс доо. Чи намайг маш их зоригжуулж, уран бүтээлийн онгод өгч байсныг чинь би чамд хэлж амжсангүй. Бүх зүйлд чинь баярлалаа" гэж Канье Уэст (Kanye West) твиттертээ бичсэн байна.

"Уран бүтээл туурвих урам зориг өгч байсанд баярлалаа" гэж Америкийн алдарт ди жей Дипло (Diplo) хэлжээ. 

"Энэ мэдээ намайг маш их цочирдууллаа. Тэр бол хэмжээлшгүй авьяас, чадвар, хүсэл мөрөөдөлтэй илүү сайн хүн болохыг хүсэж байсан залуу байсан юм. Түүний гэр бүл найз нөхөд, шүтэн бишрэгчдийг бурхан ивээг" гэж хип хоп чиглэлээр уран бүтээл туурвидаг Ж. Кол (J. Cole) бичжээ. 

"Хэлэх ч үг олдохгүй байна. #XXXTentacion чамтай хамтарч уран бүтээл туурвих сайхан байсан шүү. Чи бол жинхэнэ уран бүтээлч. Энэ үеийн хамгийн авьяастай уран бүтээлчдийн нэг" хэмээн "Blink 182" хамтлагийн Травис Баркер (Travis Barker) жиргэжээ.

Тэрээр нас барахаасаа хэдэн сарын өмнө инстаграм хуудсандаа доорх "live"-ийг хийсэн байна. Уг бичлэгт тэрээр "Хэрэв хамгийн муу зүйл жишээ нь үхэл ч юм уу, надад тохиолдвол би өөрийнхөө мөрөөдлийг биелүүлж чадахгүй. Дуугаар дамжуулан хэлэх гэсэн санааг маань хүүхдүүд ойлгосон байх гэж найдаж байна. Тэгснээр тэд илүү сайхан амьдралын төлөө эерэг өөрчлөлтүүдийг хийх байх. Хэрэв би ямар нэгэн зүйлийн золиос болж үхвэл, ядаж таван сая хүүхдийг аз жаргалтай болгосон байгаасай гэж хүсэж байна. Хэдий миний талаар онцгүй цуу яриа байдаг ч тэднийг бүү тоогоорой. Амьдралд тулгарсан асуудлуудынхаа хариуг миний амьдралаас олоосой гэж хүсэж байна. Гуниг гутрал чамайг эзэмдэхийг бүү зөвшөөр. Сүнсээ биедээ бүү захируул. Чиний оюун санаа ямар нэгэн зүйлээр хязгаарлагдах ёсгүй. Чи бодож байгаагаасаа илүү үнэ цэнэтэй. Чиний хийх ганц зүйл бол мөрөөдөх, болон тэр мөрөөдлөө биелүүлэхийн тулд зүтгэх, хичээх юм" хэмээн ярьсан байна. 

Халдлагад өртсөн өдрийн өмнөх өдөр нь тэрээр буяны үйлс хийхээр төлөвлөсөн талаараа инстаграмдаа бичсэн байна.