АНУ-ын эрх баригчид онгоцоор зорчигчдыг зөөврийн компьютер авч явахыг нь өнгөрсөн жил дөрвөн сарын хугацаатай хориглож байсан. Тэгвэл ийм шийдвэр гаргахад хүргэсэн хүн бол Их Британийн иргэн Хамаюун Тарик хэмээх энэ эр гэнэ. Тэрээр Англид машин засварын газарт ажилладаг байсан боловч луйврын хэргээр ял авснаасаа хойш хууль хяналтынхнаас зугтан Исламын улсад ирсэн байна. Өөрийнх нь бүтээсэн тэсрэх бөмбөгнөөс болж АНУ хориг тавих хэмжээнд нөлөө үзүүлсэнд Хамаюун Тарик тун их онгирч байсан аж. Зөөврийн компьютерийн батерейтэй төстэй хэлбэр хэмжээтэй тэсрэх бөмбөг хийхэд түүнийг оролцсон талаар Их Британийн тагнуулын алба 2017 онд мэдээлж байжээ. Их Британийн Дадли хотоос гаралтай 40 настай Тарик 2014 онд луйврын хэргээр ял авснаасаа хойш Исламын улс руу зугтсан байна.

Тэрээр террористуудын бүлэгт элссэнийхээ дараа твиттерт идэвхтэй пост оруулдаг болжээ. Хамаюун Тарик тэсрэх бөмбөг хийх өрөөгөө олонд гайхуулж, зургийг нь хүртэл оруулж байсан аж. "Тэсрэх бөмбөг бол миний хамгийн дуртай зэвсэг. Чи дайсан руугаа дайрах үед тэр сүнс шиг агаарт замхран алга болох болно. Тэгэх ч ёстой" хэмээн бичжээ. Мөн тэрээр тэсрэх бөмбөг хийх зааврын талаар пост оруулж, үүргээ биелүүлэхээр хүлээж буй амиа золиослогч нарыг дэмжсэн утгатай зүйлс ч бичдэг байсан гэнэ. Тэсрэх бөмбөг хийх талаар бичсэн гар бичмэлээ тэрээр нийтэд дэлгэж, үхэлд хүргэх хор хийх химийн нэгдлүүдийг ч заасан байсан аж.

Их Британийн Засгийн газрын ерөнхий нарийн бичгийн дарга Тресса Мэй түүний паспортыг 2013 онд хүчингүй болгосон гэнэ. Тэр үед Хамаюун Тарик твиттер хуудсаараа "Британийн иргэншлийг минь хураан авсан Тресса Мэйд талархлаа илэрхийлмээр байна. Би түүнийг шагнах хэрэгтэй юм шиг байна" хэмээн заналхийлсэн байна. 

Их Британийн тагнуулын албаны хуучин ажилтан Аймен Дины хэлж буйгаар Тарик одоо ч гэсэн тэсрэх бөмбөг үйлдвэрлэсээр байгаа төдийгүй дронтой (drone) тэсрэх бөмбөг ч хийж байгаа гэнэ. Тэд спортын арга хэмжээнүүдэд уг тэсрэх бөмбөгөө хэрэглэх магадлал өндөр байгаа аж.