Хавар цагт хамаг амьтан ургамал, байгаль дэлхий сэргэх хэдий ч хүний бие эд эсээ нөхөн сэргээх байгалийн зөнгөөр ядарч сульддаг. Үүний нэг илрэл нь арьс үс хуурайшиж, толгой өвдөн хууч өвчин хөдлөх нь бий. Ингээд та бүхэндээ хүрэн манжингийн ач тусын тухай багахан мэдээлэл хүргэе.

Өдөр бүр хүрэн манжингийн шүүс, ханд уувал тархины цусан хангамж нэмэгдэж, ой тогтоолт сайжирдаг. Хүрэн манжингийн найрлага дахь нитратууд хоол боловсруулах үед ходоодны хүчилд дэм өгөхөөс гадна ашигтай нянгууд тэрхүү бодист ордог байна. Энэ нь судасны ханыг цэвэрлэж, цусны эргэлтийг сайжруулдаг аж.

Эрдэмтэд судалгаандаа 70-аас дээш насныхныг хамруулан хэдэн сарын турш өглөө бүр хүрэн манжингийн аяга шүүс, ханд уулгахад хөгшчүүдийн даралт тогтворжиж, ой тогтоолт нь илт сайжирсан. Хүрэн манжинд агуулагдах бетанин нь холестериныг зохицуулах замаар элэг өөхлөх явцыг сааруулж, элэгний хэвийн үйл ажиллагааг ханган, элэгний эсийг нөхөн төлжүүлдэг байна.

Мөн цус багадах, судас хатуурах, цусны даралт ихсэх, элэг бөөр гэдэсний эмгэгийн үед хүрэн манжинг хэрэглэх эмчилгээний аргыг өнөөдрийг хүртэл зарим улс оронд уламжлал болон орчин үеийн анагаах ухаанд хэрэглэж байна. Судалгаанд хамрагдсан хүмүүс өмнө нь их мартамхай болж байгаагаа дуулгасан бол шүүс ууснаас хойш зарим дурсамж нь хүртэл сэргэсэн ажээ. 

Анхааруулахад давсалсан болон даршилсан хүрэн манжинг эмчилгээний зориулалтаар хэрэглэдэггүй. Хүрэн манжинг хоол хүнсэндээ тогтмол хэрэглэдэг хүмүүс элдэв эм тан хэрэглэхгүйгээр бүдүүн гэдэсний өвчлөлөөс сэргийлж чадна. Хүрэн манжин нь сахар, С, В, Р витаминууд кальци, сүүний хүчил, төмөр зэрэг хүний биед хэрэгцээтэй бодисуудыг агуулдаг учраас хоол боловсруулах эрхтнүүдийн үйл ажиллагааг идэвхжүүлж өгдөг.

Тиймээс хоолны эмчилгээнд хэрэглэж элэг, судас зэргийг өөхлөхөөс хамгаалж цөсийг аажмаар цэвэршүүлдэг байна.